Эрзянь келесь минек школасо
Эрзянь келесь минек школасо
Школанок Широмасово велесэ рузонь. Ансяк кавто тёжат комсеце иестэ саезь омбоце классонь тонавтницятне кармасть тонавтнеме эрзянь кель. Минь, тонавтыцятне, уроксто эйкакштнень марто кортатано ды сёрмадтано эрзякс, ёвтнетяно стихть, моратано эрзянь морот.
Школав танавтницятне сыть Мельсетьево, Куликово ды Коломасово велетнестэ. Весе сынь мельспаросо анокстыть эрзянь келень уроктненень. Сеедьстэ уроконок ютыть школань музейсэ. Тесэ пурназь сюпав материал, кона ёвтни Мордовиянь историядо, Широмасово велень седикеле эрямодо.Тонавтыцятне ней содыть, што минек велесь васня лемдязель Никольское лемсэ, а весе эрицятне ульнесть эрзят. Покшчистэ аватне оршакшность эрзянь палят мазый викшневкс марто.
Те пак паро, што вишка эрицятне кармить седее ламо содамо эсест чачома ёнксонть коряс ды кармить чарькодеме эсест раськень келенть.
Эрьва иестэ сёксня минек школасо юты эрзянь келень олимпиада, косо пелькстыть колмоце классто саезь сисемецес тонавтницятне. Теде мейле сынь пелькстыть райононь олимпиадасо. Ютазь иестэ колмоце классонь тонавтницятне Никита Шумкин ды Карина Могилевская сайсть васенце ды колмоце таркат. Сынь бажить невтемс паро содамочи.
Чадыковонь кемготовоце чистэ эрьва иене ютавтневи эрзянь келень покшчи. Республикасонок те коесь чачсь комсте ламо иеде теде икеле – ютавтнемс тиринь келень чить. Тень теизь эрзятне – эрзянь тевень ветицятне, А. П. Рябов лемсэ эрзянь келень идема фондось.
Те чись весенень алкуксонь покшчи. Тейтертне оршазь раськень оршамосо. Столь лангсо тантей чинесэ качадыть прякат, пачалксеть, поза. Гайгить эрзянь морот. Инжетненень – велень эрицятненень аностави апокш концерт.
Кадык коесь поладови ды велень эйкакштнэ седее товгак кастыть тиринь ёнксонтень вечкемаст, марить эрзянь ды мокшонь кельтнень мазычист, явить тенст сатышка мель.
Г. НАГАЕВА, эрзянь келень тонавтыцясь МБОУ «Широмасовская ООШ»