ИМЯРЕКОВ Михаил Герасимович (1936-2007)
ИМЯРЕКОВ Михаил Герасимович (1936-2007)
Мордовия Республикань Ельникень буесэ ули Лепченка веле. Сон кекшсь вирь поте. Тесэнь мазый таркатнесэ чачсь-кассь Михаил Герасимович Имяреков. Эрямонь китнень-янтнэнь ланга сон кандсы тиринь ёнксонтень, парсеень лугатненень, домка эрькетненень, лейтненень, келей паксятненень, нармунень моросо пешкее виртненень покш вечкеманть. Весе те мазычись совась поэтэнть стихезэнзэ, макссь тензэ шкинемань вийть.
Михаил Имяреков нолдась стихень кавксо пусмот. Весе сынь алтазть эйкакштнэнень. Сехте содавикстнэ — «Кизэнь валске», «Антоша космосов ливти», «Толонь кельть». Стихень колмо пусмонзо лиссть рузонь келье ютавтозь - «Бейте, барабаны», «Подвиг» ды «Мечтатели». Васенце ды колмоце классонь тонавтницятненень сёрмадсь тонавтома истят книгат: «Родной вал», «Мокшонь грамматика», «Валдо зоринеть». Нолдась кавто монографият: «Мокшэрзянь народонть устно-поэтической творчествазо» ды «Писателесь ды эрямось».
Поэтэнть книгасонзо эсь тевень тейницятне-якавтыцятне сынсь эйкакштнэ: тонавтнить школасо, лездыть покштнэнень, ванстыть пертьпельксэнть, кольнить-налксить. Цёрынетнень ды тейтерькатнень ютксо улить тевень вечкицят ды прябезарькст, прянь шныцят ды алкуксонь ялгат. Весемеде сындест поэтэсь ёвтни эсь тевень содазь ды маштозь. Стихсензэ ламо седей лембе, эйкакштнэнень покш вечкема.
М. Г. Имяреков лововсь паро журналистэкс. Республиканской газетасо, журналсо, вейсэнь пусмосо лиссть 450 ламо очеркензэ, статьянзо, фельетононзо, репортажонзо. Наукасо важодевксэзэ васняяк сюлмавозь мокшонь, эрзянь прозань, поэзиянь, драма- тургиянь, эйкакшонь литературань проблематнень тонавтнеманть-панжоманть марто. Теньсэ сонзэ путовксозо покштояк покш.
Михаил Герасимович Имяреков чачсь 1936-це иень ацамковонь 15-це чистэ Ельникень буень Лепченка велесэ сокицянь-видицянь семиясо. 1954-це иестэ прядызе Сыре Каньгуша велень средней школанть. Ульнесь Покш Уркат велень библиотекань прявтокс. Прядызе Н. П. Огарёв лемсэ эрзя-мокшонь госуниверситетэнь филологиянь факультетэнть. Важодсь Мордовиянь культурань министерствасо методистэкс, «Мокшень правда» газетань культурань ды бытэнь отделэнь прявтокс. Прядызе Мордовиянь правительствасо келень, литературань историянь ды экономикань научно-исследовательской институтонть. 1974-це иестэ саезь сон эрзя-мокшонь госуни-верситетэнь советской литературань кафедрань старшей преподаватель, доцент, 1992-це иестэ саезь куломозон- зо — финнэнь-угрань литературатнень кафедрань профессор.
Кулось поэтэсь 2007-це иень якшамковонь 25-це чистэ. Калмазь Саран ошсо.
Портретэнть теизе В. Федюнин