ВЕДЯШКИН Иван Михайлович (1923-2009)
ВЕДЯШКИН Иван Михайлович (1923-2009)
Ютазь пингень 70-80-це иетнестэ эрзянь ды мокшонь литературатнес од лемть сакшность пек чуросто. Тувталтнэде зярыяльть. Беряньстэ тонавтневсть тиринь келыне ды литературась школасо, педучилищатнесэ, вузтнэсэ, эзь явово сатышка мель раськень тевтненень. Аламот кить вечксть ловномо эрзянь ды мокшонь кельсэ сёрмадозь произведеният. А мезть сёпомс, виев произведенияткак лиснесть пек чуросто.
А стяко од литературань семинартнэненьгак, конатнень эрьва иестэ ютавтнесь Мордовиянь Писателень союзось, сёрмадыцят пурнавкшность свал аламо. Паро, лиясто лездыльть школасо тонавтыцятне, конат усксесть мартост Саранов шкинемань вечкиця эйкакшт. Истятнэнь ютксо ульнесь Орданьбуень Чукал велень средней школань эрзянь келень ды литературань тонавтыцясь И. М. Ведяшкин.
Сон школасо ветясь литературной кужине ды эрьва иестэ семинаров сакшнось кавксошка-кеменыика эйкакш марто. Сеть усксесть кой-кодат сёрмадовксткак.
Кода илязо уле, Иван Михайловичень тевезэ стяко эзь ёма. Сон кадсь эсензэ мельга молицяА Содавикс сёрмадеекс теевсть тонавтницянзр Т. Разгуляева (прозаик), Е. Самаркин (моронь сёрмадыця ды морсиця).
И. М. Ведяшкин чачсь 1923-це иеньумарьковонь 17-це чистэ Орданьбуень Кельвядни велесэ. Прядсь тонавтыцянь институт. Зярыя шкань ютазь тонавтнесь Эрзямокшонь госуниверситетэнь филологиянь факультетсэ. Ниленьгеменде ламо иеть важодсь эрзянь келень ды литературань тонавтыцякс Орданьбуень Чукал велень средней школасо. Тесэ ветясь «Васень пургондавкст» литературной кужине. Идизе филологиянь наукань кандидатонь диссертациянть. Ульнесь Ине Отечественной войнасо.
Зярдояк эзизе кадно сёрмадоманть. Произведениянзо секе тев лиснесть «Сят- ко», «Чилисема» журналтнэсэ, «Эрзянь правда» газетасо.
Ловныцятнень мельс тусь эрзянь кельсэ стихсэ «Куцян веледе ёвтамозояк» (1998), «Чивалдо» (1998), «Ратор ёнксонь морот» (2006) стихень пусмонзояк. Зярыя стихензэ совасть хрестоматияс.
Содавиксэкс теевсть «Тиринь Модань кельть» (1997) лементь ало кавто валксонзо, конатнес совасть эрзянь стувтозь ламо валт.
И. М. Ведяшкин сёрмадсь зярыя нурька пьесаткак. Сынь печатазельть «Эрзянь правда» газетасо.
Неявикс тешке Иван Михайлович Ведяшкин кадсь наукасояк. Весень мельс тусь «Залогонь категориясь эрзянь литературной кельсэнть» статьязо, кона лиссь 1979-це иестэ «Сятко журналсо.
И. М. Ведяшкин 2001-це иестэ совавтозель Россиянь Писателень союзс.
Кулось сёрмадеесь 2009-це иень таштамковонь 17-це чистэ, калмазь тиринь велесэ.
Портретэнть теизе В. Федюнин.