Алкуксонь эрзят: Тонавтыцянь чись
Алкуксонь эрзят:
Тонавтыцянь чись
Теньгушева велень школасо Минек школасо ютавтневить пек ламо мероприятият, конатне ветякшновить паро ладсо, келейстэ, лезэнь кандозь. Эрьва иене тешкстатано Тонавтыцянь покшчинть. Истя ульнесь тедедеяк.
Анокстамось те чинтень ушодовсь таштамковонь васенце читнестэ саезь. Истя мазыйстэ, вечкезь весементь тейсть школань тонавтницятне. Конатне сермадсть стихть, евтнемат, сочиненият тонавтыцятнень кувалт. Лиятне артсть мазый артовкст , анокстасть кедьтеевкст. Эрьва классось нолдась газетат. Анокстынек морот, сцена лангсо налксемат, киштемат. Коридорсо ульнесь теезь стенд «Учительские династии», цецянь выставка.
Ды вана сась те чись. Пошчинтень тердинек ветерантнэньгак, конатне важодсть зярдо-бути те школасонть. Весе эйкакштне наряжазь, цеця пусмо марто вастасть эрьва тонавтыцянть. Васенце уроконть, васенце классто саезь мик кеменцес, ютавтызь 11-це классонь тонавтницятне. Мейле актовой залсо, конась наряжазель сексень лопасо, цецясо, артовкссо, нетезель концерт. Васня школань прявтось Н.А.Гартина тонавтыцятненень евтась ламо лембе валт, седейшкавань паронь арсемат. Ушодызе концертэнть «Когда уйдем со школьного двора» моросо тонавтыцясь Е.Н.Хлебина. Мейле вейке омбоце мельга кармасть лиснеме сцена лангс артисттнэ. Веенст омбонстнэде мазыйть, гайтевть, ероковт. Улезэ те моро, налксема эли киштема – артистэнь эрьва лисемась ульнесь кенярксокс. Залсонть марявсть секе тев виев цяпамот. Покшчинть седеяк мазылгавтызь сехте вишкинеть тонавтницятне эсест морынесэст, киштемасост. Ваныцятнень седеест кецявтынзе эрзянь моросо 10-це классонь тонавтницясь Ксения Попович. Пек олясто марясть эсь прятнень сцена лангсо 11-це классонь тонавтницятне, вадрясто налксесть рольтнеь эйсэ. Весень мельс тусь «Родительские страдания» сцена лангсо налксемась. Пек вадрясто морызе тейтернесь Татьяна Хлебина «Учителя» моронть. Вайгелезэ сонзэ гайтев, мазый. Эсест талантост невтизь «Танец учителей» киштемасост 10-це классонь тонавтницятне. Истя жо невтезель школань тевтнеде кинофильма, конанть анокстызь 9-це классонь тонавтницятне. Весемесь кепедсь ежонть.
Концертэсь ютась, кода мерить, вейке лексемасо. Мейле весе вейсэ ледстнемань кувалт снимавтынек. Покшчись прядовсь ветерантнэнь марто чаень симемасо.
Е. Горбунова, Теньгушева велень школань эрзянь келень тонавтыцясь