Национальная тематика: Колмо недлят Анапасо
Национальная тематика: Колмо недлят Анапасо
Кизэнь каникулатнень прядовомсто монень савсь оймсемс Краснодарской крайсэ Анапа ошсо эйкакшонь санаториясо «Бимлюк». Мон уш умок бажинь косояк оймсемс, секскак апак арсе максынь согласия тов ардомс.
Анапа ошонтень мынь ардынек кавто чить. Кись неявсь певтеме ды а прядовиця. Ардомсто неинь эрьва кодат ошт, редия сынст мазычист. А те мазычись неяви сестэ, зярдо тон эрят велесэ, мезеяк велень эрямодонть башка а некшнят. Те весемесь тонеть неяви дивакс.
Ялгатне, конат ардсть мартон вейсэ, понгсть кортыцят ды веселат. Секскак ардомась мартост ульнесь интересной ды эряза.
Зярдо пачкодинек ошонтень, се кудонть ваксс, косо савсь миненек эрямс, минь дивсинек, кодамо мазый таркась! Икеленек аштесь покш кудо, перьканзо ламо скамикат, налксемань площадкат, а кавтосядт метрат икеленек келейгалесь леесь.
Минек вастымизь, тейсть тенек экскурсия, мейле ветимизь ужинамо. Весе ярсынек покш мель марто, секс што киде мейле сизинек. Ужинэсь весенень тусь мельс, туемстэ евтынек весенень сюкпря.
Мейле воспитательтне ветимизь комнатава. Минь эринек ниленек, колмонек ульнинек Шокша велестэ, нилецесь Саранск ошсто. Комнатась ульнесь покш, мазый ды ванькс. Балкононть лангсто неявсть чуваронь пандот, эрьва кодат касовкст, а удалост певтеме леесь.
Васенце жо чистэ мон теевинь содавиксэкс ламо эйкакш марто. Минек отрядось ульнесь весемеде дружной. Воспитательтнеяк чарькодицят ды чевте седейть.
Омбоце чистэ минь туинек леенть лангс экшелямо. Молинек лембе чуваронть ланга вете-кемень метрань сэрьсэ дюнатнень вакска. Ды вана пачкодинек леентень. Кодамо сон сэнь, певтеме! Неезесь валсо а евтавияк. Кодамо ульнесь сестэ ежом!? Оймсицятнеде тосо ульнесть байтяк.
Оймсеманть шкасто мон приминь участия эрьва кодамо конкурссо: морынь, киштинь, налксинь. Секскак активной участиянть кисэ казимизь Грамотасо.
Ютавтозь Анапасо читне ульнесть миненек покшчикс. Секс што эрьва чистэ мартонок ютавтозельть дискотекат, конкурст, евтнезельть эрьва кодат историят. Ветнимизь циркев, дильфинарияс, музеев. Ульнинек «Рыцарской турнирсэ».
Весе минь тесэ саинек эсенек туртов мезеяк од ды интересной. И арасельмель туемс тосто, секс што весе минь тосо теевинек вадря ялгакс, малавикс ломанекс. А читне ютасть пек бойкасто.
Монь оште ули мелем ардомс тов оймсеме. Весенень покш сюкпря сень кисэ, што максозель монь лемс те оймсемань путевкась.
Тишкина Татьяна, 9-це классонь тонавтницясь, МБОУ «Шокшинской СОШ»