Национальная тематика: ШУЛЯЕВ Алексей Дмитриевич (1941)
Национальная тематика: ШУЛЯЕВ Алексей Дмитриевич (1941)
Алексей Дмитриевич Шуляев – Россиянь Писателень союзонь член, Мордовия Республикань культурань заслуженной роботник, МР-нь Государственной премиянь лауреат. Сон ламо вийть путсь фольклоронь пурнамонтень. Лемензэ содасызь весе, кить вечк- сызь мокшонь ды эрзянь раськень поэзиянь мазычинть.
А. Д. Шуляев чачсь 1941-це иень умарьковонь 28-це чистэ Зубова-Полянань буень Поповка велинесэ сокицянь-видицянь семиясо. 1964-це иестэ прядызе Н. П. Огарёв лемсэ Эрзянь-мокшонь госуниверситетэнь келень ды литературань факультетэнть. 1967-це иестэ – МАССР-нь Министрань Советсэ келень, литературань, историянь ды экономикань научно-исследовательской институтонь аспирантуранть. Пенсияс туемазонзо важодсь теке институтонь литературань ды народной творчествань отделсэ старшей научной сотрудникекс. Лововсь паро важодицякс. Ламоксть ульнесь фольклоронь пурнамонь экспедициясо истят таркатнесэ, косо эрить эрзят ды мокшот, кода Армения, Башкортостан, Татарстан, Чувашиянь Республика, Нижней, Оренбург, Рязань, Пенза, Самара ёнкст.
А. Д. Шуляев пурнась 50 ламо тёжат морот, ёвкст, ёвтамот, легендат, быличкат. Покш путовксозо мокшонь ды эрзянь кезэ- рень покш читнень, койтнень вельмевтемантень. А. Д. Шуляев – фольклористикань коряс сядодо ламо важодевксэнь автор. Сехте содавикстнэ: «Художественная память народа» (1969), «Народная лирика.
Песни» (1975), «Бытование мордовской народной необрядовой лирики» (1972), «Поэзия народной души и протеста» (1980), «Мордов-ская фольклористика» (1992), «К проблеме мордовской фольклористики» (1993). Сёрмадсь «Жизнь и песня» (1986) монография, кона алтазь эрзянь-мокшонь рась-кень традиционой лирикантень.
А. Д. Шуляев – «Народоть мялямоц пефтома» («Память народа безгранична», 1993) фольклоронь коряс тонавтнема книгань автор, вузонь туртов «Мордовское устное народное творчество» тонавтнемапелень (1978) соавтор. Алексей Дмитриевич истя жо ютавтынзе рузонь келье И. Сибиряконь пурнавт эрзянь моротнень, конат совасть «Устно-поэтическое творчество мордовского народа» важодевксэнтень (Саранск, 1982. Т. 9). Покш лезэзэ «Памятники мордовского народного музыкального искусства» (Саранск, 1981. Т.1; 1984. Т.2), «Сказания о мордве: Сказки» (Саранск, 1995. Т. 3-4), «Баллады» (Саранск, 1996. Т.5) книгатнень нолдамосо.
А умок А. Д. Шуляев тешкетызе чачома чистэнзэ 75 иень юбилеензэ. «Чилисемань» теицятне ёвтыть тензэ седейшкавань паро валт, арсить шумбрачи, шкинемасо од изнявкст.
Портретэнть теизе В. Федюнин