Национальная тематика: КИШНЯКОВ Илья Прокофьевич (1922-1982)
Национальная тематика:
КИШНЯКОВ Илья Прокофьевич (1922-1982)
"Лейсэ экшелямотне, лугава чийнематне, вирев кстыйс ды пеште мельга яксематне - арази те весемесь стувтови!" - ёвтнесь Илья Прокофьевич эсь чачома-касома мастордонзо, конань мазычись сеедьстэ вастневи сонзэ произведениятнесэ. Сон весе седейсэ вечксь тиринь велензэ, тосонь эрицятнень.
Чачсь сы шкань сёрмадеесь Инсарбуень Алякс велесэ кажовонь семиясо 1922-це иень медьковонь 20-це чистэ. Вишкинестэ кадовсь тетявтомо. Савкшнось школасояк тонавтнемс, кудонь тевтненьгак якавтнемс, каникулань шкасто колхозсояк важодемс. Весемесь те мейле лездась стакачитнень изнямс тайгасо улемстэ, сестэ, зярдо средней школань прядома- до мейле тукшнось Дальней Востоков. Важодсь ударной стройкасо Амур лей лангсо Комсомольск ошсо. Те ульнесь 1939-це иестэ. Се шканть сон парсте невтизе «Вешнеса эсь тештем» ды «Менельсэ монь тештем» романтнэсэ.
Войнань иетнестэ ульнесь лётчикекс-штурмовикекс. Немецкой фашисттнэнь изнямодост мейле тюрсь японской милитаристтнэнь каршо, воёвась Манчжуриясо ды Кореясо.
Седе мейле велявтсь Мордовияв. Важодсь «Мокшень правда» газетань редакциясо, эрзянь-мокшонь книгань издательствасо, «Мокша» журналсо, кочкавкшнось Мордовиянь сёрмадеень союзонь правлениянь ответственной секретарей.
Шкинемань кинзэ сёрмадеесь ушодызе ёвтнемань сёрмадомасто. Сёрмадсь
велень ломантнеде, невтсь ютксост алкуксонь ялгаксчинть, згилясь-раксесь беряньстэ прянь ветицятнень лангсо.
«Течинь тевенек» ёвтнемань васенце книгазо лиссь 1954-це иестэ. Ловныцятне сонзэ вастызь лембестэ. 1956-це иестэ лиссь повестень ды ёвтнемань омбоце книгазо - «Васенце вечкема». Произведениятнесэ ёвтнемась моли од ломантнень ютксо кеме ояксчиденть, кона лезды изнямс эрямонь стакачитнень. Повестне ды ёвтнематне шождасто ловновицят, витить ёжо, кепедить паро тевс мельть. Сынст эрявиксчист эзь алкиньгадо неень шкас.
Сёрмадсь пьесат: «Тундо», «Валаня ки», «Уледе шумбрат!» ды лият. «Пря орма» пьесанть сёрмадызь И. М. Девинэнь марто вейсэ.
И. П. Кишняковонь шкинемань виезэ покштояк покшоль. Сехте пек те неяви «Иссась чуди Волгав» романсонзо. Васенцеде сон нолдазель 1962-це иестэ, лемдезель повестекс. Седе мейле писателесь келейгавтызе сонзэ, оде ваннынзе-арсинзе койкона таркатнень. Повестесь кассь романокс, сон оде лиссь 1965-це иестэ. Эйсэнзэ невтеви войнадо мейлень веленть кинзэ-янонзо, тевензэ.
И. П. Кишняковонь шкинеманзо парсте содасызь аволь ансяк мокшотне. Ламо произведениянзо ютавтозь рузонь ды эрзянь кельтнес.
И. П. Кишняков 1958-це иестэ примазель СССР-нь Писателень союзс.
Кулось писателесь 1982-це иень медьковонь 23-це чистэ. Калмазь Саранскойсэ.
Портретэнть теизе В. Федюнин