Национальная тематика: «Раужо ярмактне» – те кеж (сцена лангсо налксема).
Национальная тематика:
«Раужо ярмактне» – те кеж (сцена лангсо налксема). Налксицятне:
Марфа баба – сыре ава, 60 иесэ, велесэ «кежей ведень» микшниця.
Охрем – Марфа бабань мирдезэ.
Иван – 30 иесэ сынст цёраст, тракторист
Анна – 28 иесэ, тонавтыця, Ванькань низэ.
Анкань ялганзо.
Тевесь моли велесэ, кудосот Марфа ды Охрем кавонест.
Марфа баба. Вана и минь саеме урьвине. Ней карми улеме лездыцякс. Моненьгак седе шождыне ули.
Охрем. Да саинек, ды урьваськак понгсь тенек пек мазый, превей. Ванан, тевтненьгак топавты вадрясто. Ансяк мейсэ сон карми теть лездамо? «Кежей ведень» панеме? Ха-ха-ха (раки атясь).
Марфа баба. Мезе истя ракат? Шабранок марятадызь. А мекс бу те тевсэнть монень а лездамс? Седе ламо ярмаконок улевельть. А ней ськамон а кенерян.
Охрем. Ва, сыре баба, иляк токше Аннань, те тевентень илик педявто. Сон неяви, симицятненень покш мель а яви. Мекевланг, яла корты: «Озавтомс бу весе «кежей ведень» паницятнень».
Марфа баба. Тон косто содат, мезе сон теде арси. Тонеть штоли теде кортась?
Охрем. Монень эзь корта, монсь мария, кода Анна теде ёвтнесь Иваннэнь. Ансяк Иван тензэ эзинзить ёвта, што тонгак те тевсэнть човорязят.
Марфа баба. Чатьмонть, сыре карго. Арсят урьванок туи ававтонть каршо? Ёвты мондень полицияс штоли?
Охрем. Мон а содан, ёвты сон, а ёвты. Ансяк тонеть сави салавинькине те тевенть теемс, ды аволь кудосо. Вана, варштак каштомонть лангс, тосо зяро флягатнеде пешксе «чапамо ведте»? Преветь маштыть.
Марфа баба. Преветь, мерят, маштыть? А косто бу лиясто саевлинек ярмаконок Иванонь туртов? Ведь сонензэ эряви машина. А пенсиянок лангс сон рамави?
Охрем. Ну и чаво баба… Ды те ярмактнень кисэ пель веле лангозонок кежейть. Эрьва аванть симиця мирдезэ сы тонеть те «кежей веденть» кисэ, остатка ярмаконзо миненек кандсы. А мейле семиясост сёвномкат. А ведь неть сёвномкатне весе минек прязонок.
Марфа баба. Лоткак, шержей прясот мезе а эряви кортамо. Чатьмонть, кие – бути маряви сови тенек.
Сови Анна.
Анна. Вай, кода течи сизинь ды кельминь. Школанок якшамо, экономия…Кузян каштом лангс, эжнян аламос.
Марфа баба. Ужо, Анна, иля кузне тов. Тосо валязь нулат – валат, мадемскак а козонь. Вана, урядаса тосто, ливтнесынь шубатнень, сестэ и мадят. А ней пецьканть ёжос озак, пильгезэть лембе кемть оршак.
Анна (дивазь варштась ававтонть лангс, турватнесэ кодамо – бути мизолкс). Ну, паро, бути истя, то аламос пецьканть ёжосо аштян. Мейле киякстнэнь шлясынь.
Обед шка, сови роботамсто Иван.
Иван. Авай, ямось пись? Каяк тень, пекем вачсь. А то курок тень мекев туемс роботамо. Сынь ансяк обедамо.
Марфа баба. Монь весе анок, озадо, вейсэ и обедатано. Аняяк ансяк сась, апак ярса оштё.
Весе озыть ярсамо.
Иван. Течи Кобай Сёма мекев эзь лисе роботамо. Тракторозо чаво, ломань арась кинь озавтомс. Прявтось сёвны, кудов тензэ якась, Сёма иредьстэ.
Анна. Ды косто сынь сайнесызь те «кежей веденть»? Бути улевлинь полициясо роботник, весень пекставлинь ды седе покш штраф путовлинь микшницятнень лангс. Кадык а колыть ломантнень шумбрачист ды семияст.
Иван. Авай, марят , мезе корты Анна? (састо раки)
Анна. А мейсэ тесэ авт? Сон што-ли микшни эйсэнзэ?(учи мезе ёвты автось, сельме алга ванны састыне).
Марфа баба. Арась, тейтернем, те цёрам истя ракси лангсом. Ярсадо, а то весе кельмить, ды Иваннэнь туемс уш роботамо. Обедэсь уш прядови, учомонзо кармить.
Весе стить столенть экшстэ. Марфа ды Анна урядасызь столенть. Иван туи роботамо. Сыретне мадить оймсеме. Анна ушоды шлямо киякстнэнь.
Анна. Школасо сизинь, ды шлямотне оштё кодаяк а прядовить (пачкоди каштомонть пелев кузема таркантень, шаштсы шаршавонть ды абунгады). Те мезе тосо флягатнесэ знярось? (кузи каштомонть лангс, варшты вейке кедьёнксонтень, тосто каршозонзо «чапамо чине»). Эх, ававтось микшни..? (потомдасы кургонзо). Ну, ладна…
Шкась чокшне малав. Иван оштё эзь са роботамсто. Сыретне косо – бути ушосот. Анна сыргась молеме ялганзо туртов, сынст семияст ошё арасть. Анна ёвты атявтонтень ды туи. Сы Ванька.
Ванька. А косо Анна?
Охрем. Мерсь, туян ялганень. Курок велявты.
Ванька. Кулянь кунсоломо, эли тошнызе кудосо.
Марфа баба. Кадык моли, аволь сыре ломань. Минь вана уш ковгак а мольтяно.
Сови Анна.
Анна. Вана и мон сынь (ёжозо паро, мизолды). Ялганень якинь, ваннынь мезе теить. Валске арсетяно вейсэ ютамс велева, ванномс, ков седе пек ветить китне симицятнень. Анокстатано списка ды полицияв…
Марфа баба. Вай, шайтянт, мезекс те тыненк эряви? Тень кисэ кияк тыненк а ёвты сюкпря.
Анна (мизолдозь). Кадык, паряк аламос пелеме кармить микшнемеде ды симдеме цёратнень эйсэ.
Охрем. Я, бабай, мерить теть, очередесь сы курок тонеть.
Чокшне, весе удыть. Марфа баба арси, мезе тееме карми, бути сыть полицейскойтне тензэ. Сась валскесь. Иван тусь роботамо. Аннань оймсемань чи, ков – бути тусь. Охрем эсензэ тевть теи. Шкась ютась уш ламо. Ульцява неявить сыцят, оршазь полициянь оршамосо. Молить Мафа бабанть кудонзо ёнов. Кенкшентень стукамо.
Марфа баба. Кие тосо? Кенкшесь буто панжадо.
Стукицясь. Совамс можна? Минек вана кедьсэнек конёв лангозонк.
Марфа баба (тандадозь) Кодамо конёв? Мон мезеяк киненьгак берянь эзинь тее.
Кудов совить вете ломанть, кавто цёрат, колмо тейтерть. Картузтнэ весень нолдазь сельмест лангс, тейтертне пек ваднезь.
Совицятнень ютксто вейкесь. Вана велень ломантне кортыть, што тынь «кежей ведте» микшнетядо. Сави ванномс кудонк. Бути видеть кортамотне, путтано покш штраф.
Марфа баба. Кодамо «кежей ведь»? Мезеяк а содан. Те ломантне стяко кортыть, сельмест мезеяк лангс сявадыть.
Совицясь. Ялгат, ваннынк кудонзо (вейкесь ютась каштомонть пелев, варштась ды сергедсь). Ваннодо, тесэ зяро чапамось!
Марфа баба кирнявты ды пирясы кинть каштомонть ёнов остаткатненень. Сеть лоткить, ваныть карадо – каршо.
Марфа баба. А макссынь, те аволь микшнемань, те тевс теезь. А макссынь, тозонь зняро сахар каязь!
Совицятнень ютксто вейкесь карми пейдеме. Марфа баба варшты лангозонзо, содасы Аннань, сы превезэнзэ ды кода серьгеди…
Марфа баба. Ах, те тон, Анна? Ах, тон шайтян! Те тон ялгат марто тандавтымик куломас? Мон вана тенк…(каподьсы ухватонть ды сырги «инжензэ» мельга, сеть чиезь ношкстыть ушов, Марфа баба велявты мекев, озы, стакасто лекси, сови Охрем).
Охрем. Мезе лиссь мартот? Чамат теке лов. Мекс истя Анна чии ялганзо марто кедьстэнек? Ды мекс сынь весе оршазь полицейскоень оршамосо?
Марфа баба. Адя Охрем урядасынек каштомонть, штобу те «чапамонть» илязо уле чинезэяк. Ярмактнеяк а эрявить! Сыть вана истя весе велень симицятнень нист, сестэ алкукскак кулан срамдо. Эли совить алкуксонь полицейскойть, сыре прясон озавтсамизь. Кадык одтнэ сынсь роботыть ды рамить машина, а минь пенсиянок тенст карматано макснеме. Чарькодинь, «раужо ярмактне» – те кеж, стака кеж.
Шаршавось новоли. Козлова Наталия, 11-це классонь тонавтниця МБОУ «Шокшинской СОШ»